sunday service

November 4, 2017 § Leave a comment

matag Dominggo, muhalok akong tuhod
sa tiles, manlimpyo sa giludhang porselana.
mabati ko ang bendisyon sa disinfectant
hapdos sa akong aping.

dayong duko, trapohan ang singot sa agtang,
kupot sa dughan, mangayog ginhawa
maghandom sa pamilya nga sila mapadal-an
magdahom nga grasya gihapon ang
mutubag, bisag ako nalimot na sa
pagsimba
(Rotorua, New Zealand)

Advertisements

Pan Balaan

April 22, 2017 § Leave a comment

Kampana ang kahumot sa pan sa Arbee’s; bag-ong luto.
Hinay-hinayng nilakaw akong kobalong tiil nga nalimot unsa ang makatsinelas.
Mahulog sa yuta ang lapok sa akong nawng
kon asa nagminyo ang luha, singot, ug abog sa kadlawong kalsada.

Sa pagduol nako, nikanta ang tiyan nga gahilab,
nangandoy nga mahapuhap ang pan
likod sa bildo ug alisngaw.

Sa kagutom, nausab ang nawng sa ginoo.

Ang init sa bag-ong haon mabati nalang sa kurog nga kamot.
Ang mata nipiyong, daw nag-ugom.

Ninaog akong kamot palayo sa bildo,
Ug ako nanguros.

Elyen

December 29, 2016 § Leave a comment

Sa kabaga sa bungbong sa taas nga building,
usahay malimot ko nga duol mis langit.
Naigking ko pagkadungog sa dalugdog;
Pila naman tawn ko ka-oras diri naglingkod?

Akong gutom raba, mutultol na og lunchtime.
Akong ihi, magtimaan na og break.
Ang kahayag sa akong damgo, naggikan nalang sa screen.

Nihilak
daw ang langit. Nabati kini sa akong aping.
Ug ako, mangihi kada saisenta minutos,
naghinaot nga di ko malimot
nga ako tawo.

Disinfection, Exfoliation

July 25, 2016 § Leave a comment

Di mapundo akong
wala nga kamot
sa tanang giingon
sa Muklo.

Wala niya hisgoti ang kobal nga nagpalibot sa iyang dughan,
ang kobal nga nagpabaga sa iyang alubaw
ang kobal sa tiyan sa gipanggutom nga ganahan makalimot kon unsa ang magutman
ang kobal sa mga way undang sa pagpangumo
ang kobal sa liog nga di na kamao mulingi

Apan pwerting hisgot niya
sa limpyo niyang mga kamot.
Lumoy. Humot.
Angayang ilabay sa langit.
Mga kamot nga nasubraan sa pagpanghunaw.

Muklo, unsang hugaw ang imong nahikapan
nga ikaw nanghunaw og taman?

 

Alang sa akong “Modern Dad”

July 7, 2016 § 1 Comment

Kon pangutan-on ko unsa nang “daddy”, mutubag ko
“Kanang mangitag kimpit para sa hayhayan”
kay siya nangitag mukupot sa iyang mga nilabhan.
Saon ta man, pirme mabali ang mga karaang kimpit sa kamot niyang bug-at.
Pwede sad
“Kanang magsigeg pangita og dagom ug hilo”
kay siya ray kamao mu-ayo sa mga gisi
sa pajama sa iyang mga anak nga pagyaka ra ang nahibaw-an.
Magyawyaw god na siya nganong iyang mga anak di kamao muluto, mulaba, mulimpyo sama niya.
Siya pod
“ang palasyagit og ‘PISTENG YAWA BWESET’
sa alas kwatros kadlawn
kay gilutuan niya ang iyang mga anak og bawn.
Nahimo pa gyod siyang alarm clock sa iyang mga daga
ug sa mga manok nga nanghimuta pa.
Multitasker, oh diba?
Ug amahan
“ang tigtunol sa beer”
“ang tigsyagit og ‘Ay sigeg hinimi diha'”
kay di siya kamao muam-am sa iyang daga nga
gikapoy og pangitag tawo nga mupangga
sama sa iyang papa.
**The dad in this poem is loosely based on my actual dad. lol.**

Red Rice

April 2, 2016 § Leave a comment

Di na ba kaha ko magutman
kon masudlan og bala akong tiyan?
Tarongon ba kaha ko og tugsok
sa basakan nga nabahaan og dugo?
Manambok ba ang humay
kon ako diri madugta?

Ararohon na ko.
Mamatay pod ba ang hasyindero
kon mukaon siya sa akong bugas?

 

***
Alang sa mga mag-uuma nga nagpakaon og mga ingrata.

Kahidlaw

March 14, 2016 § Leave a comment

Masukod ba ang kahidlaw
sa mga lawa nga gilugwa sa kaka sa suok sa balay nga
nanambok sa kahilom?

Tubag ang kahidlaw.
Masubay nimo sa kaputi sa buhok kon pangutan-ong,
“Kanus-a pa?”
Gibug-aton ang kahidlaw
sa mga luhang gikapoy na sa pagkanaog
sa aping sa tawong nag-apong sa bintana.

O makita ra ba gyod ang kahidlaw
sa kada basang pilok?
sa kada buhok nga ning-upod sa silhig?
sa gasayawng mga langaw ibabaw sa bolingon?

Where Am I?

You are currently browsing entries tagged with #Balak at Ink-onstipated.