Kimba

June 28, 2015 § 2 Comments

Usahay, kon naa sa mood, maglakaw ko gikan Laray padulong Cansojong, magsubay sa SRP. Mahal man ang kinse-pesos na plite sa sikad gud. Dugay pa gyod makadala’g tuyok didto’s San Roque… Tanke… na, abtan ka’g siyam-siyam. Mao nang, maglakaw. Basi mugamay pa diay ko. Sa paglakaw nako kausa, didto ko lang nabantayan nga dako na ang kausaban sa sitio na among gipuy-an sauna. Kimba.

Giabonohan na siya. Wala na’y mga balay. Makita nimo gikan sa sidewalk sa SRP na ang Kimba naa na sa luyo sa duha ka kan-anan kon diin ang usa kay part time worship place sa usa ka relihiyon matag dominggo. Gatuo man ko na dako ang lugar ba kaniadtong siyete pa akong edad, apan sa gilay-on nako gikan sa nawanangang Kimba ug sa sidewalk, daw usa ra siya ka dangkal.

Ang balay atong dato-on na silingan namo nga gi-cancer mura ra’g malakaw nako’g pipila ka mga tikang. Ilahang balay nalang akong maklarong nagtindog. Makita ra sab dayon nako ang balay atong ka-hampang nakong miga, si Mich, na makahinumdom pa ko na ako gisuwat sa akong diary iyang kagwapa. Mura’g duol ra sab kaayo lantawon ang kahoy sa mansanitas na kusog kat-katan ni Kuya Toto. Hilig man gud niyang manghadlok sa ako og mansanitas kay, lage, lud-an ko niini. Di na nako makita ang balay nilang Raray Tomboy, nilang Botchok (nga gi-oran ang akong pambabaw na uniporme) ug ang among balay. Maglisod ko ug tuo na sa kadaghan namong silingan, sa kadaghang tao na akong nailhan sa pila ka-tuig namong pagpuyo sa Kimba, ang yuta na naggunit namong tanan kay daw kalimutaw lang sa insik na hakog. Lisud huna-hunaon na ang ka-solido sa akong panumduman niining lugara wala nabalhin sa mga wangkig na kahoy nga maoy materyal sa mga balay na naugdaw sa kadawo.

Bisag mas dugay na ko karong nagpuyo sa Cansojong (murag otso anyos ko atong namalhin mi), ang Kimba man gihapon akong mahuna-hunaan basta madunggan ko ang pulong na “Home”. Sa kailaluman sa akong pangutok, dili imahe sa kongkretong bongbong akong makit-an na maoy katapad nako karon. Dili sab ang vinyl na minghapin sa kada tikang sa among hagdanan. Labaw na dili sab ang blue nakong pultahan na simang sa brown-ivory na color scheme sa among bag-ong tukod na balay. Akong makita sa, ang hayahay na kahoyng bongbong na gikamangan og mga kuting mao nang mangatol ko’g taman kon magtapad mi’s pagtulog. Mahinumduman ko ang gahibat na ang-ang sa hagdanan na mao’y rason nga damo kaayo ko’g bun-og sa akong tuhod gikan sa pagdali-dali og saka. Ug dili blue, kundi pink nga kolor akong makit-an na mao’y pintal sa akong karaang kwarto nga naa’y dako na bintana nga pirmi ko pakit-on og asul na kalangitan. Tinuod, dako gyod ang kausaban sa akong kinabuhi diri sa Cansojong gikan sa pagpuyo namo’s Kimba.

Ug nidako sab ko. Sa kawangkig nako atong latagaw pa ko na toddler, hastang dako-a sa akong panan-aw sa Kimba. Ang balay nilang Nina-dato (kay naa sad ko’y silingan nga si Nina-pobre; tuo lang, angga gyod ni nila didto) nga luyo lang sa balay sa among atubangan mura ma’g tunga sa kilometros ang gilay-on. Ang mga kanal likod sa amo na nibuwag sa balay sa mga Abarquez ug ilang Ce-An kay murag anak ni Mananga. Ang gidungog nga taw-an na mangga duol sa poso kay murag 20 kabuok tawo ang mag-gakos para kini matuyok. Nadiskobre nako na kining mga paglantaw sa kadak-on sa Kimba kay tungod lamang sa akong kagamyon. Karong dako na ko, nagtindog sa height na 5’4” (matod ni sa sukod sa clinic sa UP ha), di man diay kaayo dako ang Kimba. Mura lang siya’g usa o duha ka-dangkal kon magtindog ka sa sidewalk sa SRP. Kalimutaw sa mata sa nidaog na insik. Nahimatngon ko na samtang ang Kimba nausab, na-abonohan, ako sab. Na basi nigamay lang ang Kimba kay tungod ako mingdako na. Pero diba, mas maayo? Sa gamay na Kimba, mas dali ko kini masulod sa akong dughan na nagkadako sa panahon ug tungod sa nagkadaghan na nakong gihandom – ala Bonsai ni Edith Tiempo ba. Kay sa pagkaugdaw sa lugar na akong nadak-an, akong mga paghandom sa ila kay sublimasyon nalang sa kada lapok, kahoy ug ngisi na makit-an nalang sa akong pagpiyong.

Advertisements

Tagged: , , , , , ,

§ 2 Responses to Kimba

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

What’s this?

You are currently reading Kimba at Ink-onstipated.

meta

%d bloggers like this: